Fshati Rradhimë

Fshati Rradhimë ndodhet në shpatin perëndimor të malit të Lungarës, në jug të qytetit të Vlorës. Sipërfaqja që përfshin kufijtë tradicionalë të fshatit është afërsisht 2.000 ha.  Fshati është i vendosur në një kuotë 150 - 180 m mbi nivelin e detit, distanca maksimale veri-jug është rreth 7.5 km ndërsa lindje-perëndim (deri tek buza e detit) është 4.5 km, distanca në vijë ajrore nga qëndra e fshatit deri në buzën e detit është rreth 1.100 m.

Gjetje arkeologjike në varret e zbuluar në majën e Bregut dhe tek shtëpitë e Beqir Mjaltit e Brahim Begotare, si edhe disa gjetje në Mavrenerua dhe Virua tregojnë se Radhima ka qënë një vend-banim i hershëm që datohet minimalisht prej shek.III - II p.e.s. Për herë të parë në një hartë emri Radhimë, gjëndet i hedhur në vitin 1118.

Përmendet për rritjen e derrave, prodhimin e verës dhe të shajakut. Ka drejtim kryesor prodhimin e agrumeve, ullirit, vreshtarisë dhe turizmin. Në Radhimë mbizotëron një klimë tipike mesdhetare me dimër të butë dhe verë të freskët e me plot diell. Radhima ka një bregdet që përfshihet nga Ura e Vrizit deri tek derdhja e lumit të Izvorit dhe kap nje gjatësi prej 7.450 ml, ndërsa perimetri i kufirit tokësor është 15.700 ml.