Mali me Gropa-Bizë-Martanesh

Parku Natyror "Mali me Gropa-Bizë-Martanesh" ndodhet në qarkun e Tiranës, Dibrës dhe Elbasanit. Kjo zonë kufizohet ngushtë me Parkun Kombëtar të Dajtit nga veriperëndimi i saj. Është gjithashtu, ekologjikisht e lidhur ngushtë me pellgun e Bovillës dhe Parkun Kombëtar të Qafështamës, që ndodhen më në veriperëndim, duke qenë vazhdim natyror i njëri-tjetrit. Është ndër zonat më të reja të shpallura si Park Natyror, në janar të vitit 2022.

Mali me Gropa, është i mbushur gropa, hinka dhe puse të shumta karstike, si vetë emri që e karakterizon. Me sipërfaqe prej rreth 252.7 km2, ku përfshihen pyje, ripyllëzime, pyje të rrallë ose tokë me bimësi pyjore, sipërfaqe bujqësore dhe pemëtore, kullota, livadhe me bimësi të rrallë dhe troje urbane, e përzier me tokë bujqësore, pemishte e pyje. Mbi të ngrihen disa maja të veçuara si: maja e Bastarit, Micekut dhe e Snoit të Madh.

Gropa e Bizës është e gjatë 4 km, e gjerë deri në 2 km dhe shtrihet rreth 1200 m, mbi nivelin e detit. Gropën e Bizës e drenon lumi me të njëjtin emër, i cili hyn në brendësi të masivit gëlqeror, në një grykë të ngushtë. Pas një rruge të shkurtër sipërfaqësore, kthehet nga e djathta dhe humbet në brendësi të shpellës së madhe karstike të Ariut ose Valit. Uji i tij, sipas pohimeve të banorëve vendas, del poshtë fshatit Val dhe përfundon në Lumin Mat.

Këtu bën pjesë edhe Malësia e Martaneshit, pjesa lindore e saj e cila përbëhet nga ultrabazikë, me peizazh dominues akullnajor. Gjithashtu edhe Malësia e Çermenikës, pjesa veriore e saj e cila përbëhet nga flishi, me reliev më të butë, por tepër të copëtuar.

Rajoni konsiderohet si një vend me një potencial të madh ekoturistik. Zona ofron vlera natyrore, kulturore dhe historike. Në dimër ai është pothuaj gjithnjë i mbuluar me borë, që arrin me raste deri në disa metra, duke e bërë të përshtatshëm për sportin e skisë ekstreme. Në këtë rajon shtrihet krahina etnogjeografike e Shëngjergjit ose Tomadheja, që së bashku me Bendën, përbën Malësinë e Tiranës. Parku Natyror mbart vlera potenciale të mëdha për zhvillimin e turizmit.