Bjeshka e Oroshit, Lezhë

Bjeshka e Oroshit ndodhet në lindje të Rrëshenit, në Lezhë. Oroshi është edhe zemra e Mirditës, me sipërfaqe prej 4.745.00 ha. Është shpallur zonë e mbrojtur e resurseve të menaxhuara, në vitin 1996.

Kjo është një zonë malore mjaft atraktive me mundësi të shumta për zhvillimin e llojeve të turizmit malor. Janë të përhapura lëndinat, burimet, shpatet e thepisur dhe kullotat alpine. Zona më interesante është Nënshejti me burimet e ujit dhe fushat e Lugjeve. Oroshi është gjithashtu një vend i rëndësishëm historik. Këtu ndodhej bërthama e krijimit të krahinës së Mirditës dhe njëkohësisht në shek.XV, ka qenë një nga qendrat më të rëndësishme të rezistencës anti-osmane. Në Orosh, ka qenë edhe abacia e Mirditës.

Zona e bjeshkëve me formacione gjeologjike mbetet mjaft interesante, me shpella e puse karstike, të një vlere shkencore dhe njohëse. Një ndër to është edhe shpella e Pashës, e cila është kthyer në atraksion për turistët. Oroshi përfaqëson një zonë me kombinim të pyjeve: të pishës së zezë, ahishteve dhe të rrobullit. Nëpër të çarat e shkëmbinjve takohen bimë si: geranium macrorrhizum, asplenium trichomanes, saxofraga paniculata, athamantha macedonica, achillea frasii etj, të gjithë indikatorë të natyralitetit të pyllit apo të gjendjes klimatike të tij.

Kjo është një zonë me bukuri të rrallë natyrore ku mund të praktikohet turizmi gjithëpërfshirës, i gjelbër, i bardhë, kulturor dhe historik. Mikpritja në traditën e mirditorit është një nga virtytet më të rëndësishme