Kisha Katolike Kac, Pukë

Fshatrat Kaçë dhe Naraç shtrihen në pjesën verilindore të fushës së Zadrimës, aty ku shtrati i lumit Drin del nga pjesa malore për në fushë. Në fillimet e shek.XX kalonin shtretërit e lumit Gjadër dhe përroit të Glinës, që përmenden që nga mesjeta bashkë me kishën në fjalë.

•Kisha “Shën Mëria e të ngjiturit në qiell” përmendet për herë të parë: në relacionin e Arqipeshkëvit të Tivarit, Marin Bici në vitin 1610.

•Në një tjetër relacion të vitit 1632 Ipeshkëv i Sapës Gjergj Bardhi shkruan se:  Kisha e Shën Mërisë kishte vreshta dhe kujdestarët e saj.

 •Gjithashtu në vitin 1638 Arqipeshkëvi i Tivarit shkruan se:  kjo kishë famullitare ka tre fshatra, Ranëzën, Hajmelin dhe Naraçin.

•Restaurimi i fundit i Kishës daton rreth vitit 1880 dhe ky fakt përmendet nga relacioni i Ipeshkëv Giulio Marsili.

Kisha gjatë periudhës ateiste ishte kthyer në depo bujqësore dhe iu hoqën këmbanorja, altari dhe instalime të ndryshme kishtare në fasada. Me gjithë ndryshimet objekti ruajti formën e plotë të tij, kryesisht nga jashtë ku u ruajtën muret prej guri. Sot ky objekt kishtar i është rikthyer sërish Dioqezës së Sapës.