Fshati Kuç

Fshati Kuç shtrihet në anën jugperëndimore të krahinës së Kurveleshit, 60 km nga Saranda dhe 62 km nga Vlora. Kuçi ka një sipërfaqe prej 180 km² dhe lartësi rreth 620 m mbi nivelin e detit. Është një nga fshatrat më të njohura të Labërisë, më i madhi i krahinës së Kurveleshit, si nga sipërfaqja dhe nga popullsia.

Kuçi gjatë luftës së dytë botërore luajti një rol vendimtar, me rëndësi të veçantë historike në të gjitha krahinat përreth. Nga "Unioni Botëror i Paqes" në Bolonjë, në vitin 1999 u shpall "Fshat Martir", për shkak të shumë dëshmorëve, heronjve e personalitete të historisë. Banoret njihen për trima dhe përparimtar. Në Kuç është mbajtur "Kuvendi i Labërisë" dhe labët ndihen shumë krenarë për të. Kuvendi ka qënë shumë i rëndësishëm sepse në të janë diskutuar dhe vendosur një sërë rregullash, të cilat parandaluan gjakmarrjen ,martesën e fëmijëve që në djep, si dhe lehtësuan ndjeshëm pozitën e gruas ne shoqeri. Në kuvend kanë marrë pjesë delegatë nga të gjitha trevat shqiptare, përfshi këtu edhe Kosovën dhe Çamërinë.

Kuçi është i rrethuar nga një kurorë malesh të larta, të cilat përbëhen nga shkëmbinj gëlqerorë. Malet në lindje janë: mali Papadhia, mali i Golemit, Gjoshnikoshi, malet Shkage, maja e Shytit, Balçik, Zareli. Në veri: Valthi, maja e Mureve, maja e Kunjovës Pleshovica, që shtrihen përkatësisht në veri e lindje. Në perëndim: mali i Bogonicës, pjesa e vargut të Çikës. Në jug: mali i Çorrajt, mali i Shëndëllisë me majën e Gjinikut.

Ka nje bimesi ku mbizoterojne shkurret e tipit mesdhetar si: sqina, koçimarja, lis(përralli), mersina, shqopa, cfaka, thrumja, sherebeli etj. Gjenden edhe kafshë e shpendë të egra si: derri, lepuri, kunadhia, kukumjaçka, harabeli, gushkuqi etj. Në lumin e Shushicës gjenden me shumice: trofta, ndërsa në përrenjtë që derdhen në lumë ka shumë krap dhe ngjala.   

Zona e Kuçit ka pasuri të shumta ujërash, rreth 160 burime ujore, në mesin e të cilave dallohen buronjat e Lepushes dhe buronjat e Kuçit, një nga burimet më të mëdha karstike të Shqipërisë jugore. Në Kuç, bujaria, krenaria dhe mikpritja janë të ngritura në kult. Kur mysafirët shtrohen në tryezë, aty nuk mungon rakia, dollia dhe kënga polifonike labe fillon qetë-qetë e ngrihet madhështore dhe epike, sikundër janë malet përreth.