Fshati Piqeras

Fshati Piqeras ndodhet midis Lukovës dhe Borshit, vetëm 28 km nga Saranda. Fshati shtrihet në një kodrinë të gjelbëruar, midis malit e detit. Karakteristikë janë shtëpitë dykatëshe prej guri, me çati të kuqe, me dritaret që vështrojnë nga deti. Gjithashtu plantacione të pafundme ullinjsh e agrumesh, që zbresin valë-valë deri në rërën e detit, ku fshihen plazhet e pa shkelura të këtij relievi të pazakontë.

Në kodrën mbi Piqeras ndodhet Manastiri i Kremensovës, i cili mendohet se është ndërtuar në vitin 1672. Manastiri duket si një kullë vrojtuese përmbi fshat dhe të mundëson vështrimin nga ishujt e Korfuzit, kodrat e Kakomesë e malit të Shëndëlliut dhe deri në majën e Llogarasë me gjithë hapësirën ujore të detit Jon, që përfshihet në këtë hapësirë.

Piqerasi mbetet fshati më me kulturë i bregdetit, me njerëz të urtë e të mirë. Ata që jetojnë sot në Piqeras janë një numër i vogël banorësh kryesisht të moshuar, që pjesën më të madhe të ditës e kalojnë mes kujdesit për trëndafilat dhe të mbjellave të stinës. Ky fshat  vizitohet nga shumë turistë të huaj e vendas, të cilët mbeten të mahnitur nga bukuritë e këtij fshati shekullor.