Plazhi i Golemit

Plazhi i Golemit ndodhet midis Shkëmbit të Kavajës dhe përfundon deri tek derdhja e përroit të Leshniqes, në një gjatësi prej 5 km. Plazhi i Golemit është i dyti për nga madhësia, pas plazhit të Durrësit. Brezi mbrojtës i pyllit me pisha të mbjellura nga njeriu ka krijuar një mjedis pylli mjaft funksional prej 205 ha, i cili i rrit shumë vlerat këtij plazhi. Fauna e gjallëron këtë zonë, me elementet e dunave dhe të pyllit.  Ndër më të përmendurit janë: lepuri i egër, nuse lala, bretkosa e zakonshme, breshka e zakonshme. Ndërsa në pyll rriten: qukapiku, laraska, bilbili, gjelza pikaloshe etj.

Bregu i detit ka rërë të bardhë e të pastër, detin e kaltër, së bashku me gjelbërimin e përhershëm të pishave krijon një harmoni trengjyrësh mjaft tërheqës e shlodhës. Golemi me baret, restorantet e hotelet bashkohore, me gastronominë e larmishme të mishit dhe peshkut  ka qenë dhe mbetet një destinacion mjaft i frekuentuar në çdo periudhë të vitit.