Fshati Baldushk

Fshati Baldushk ndodhet 15 km në jugperëndim të Tiranës. Baldushku kufizohet në veri me Vaqarrin, në lindje me Bërzhitën e Petrelën, në jug me Peqinin dhe në perëndim me Pezën e Kavajën. Sipërfaqja e përgjithshme është mbi 31.5 km² dhe popullsia arrin në 5267 banorë.

•Në fshatin Koçaj të zonës së Baldushkut në jug të kryeqytetit, janë zbuluar gjurmë të një banese antike. Banesa i takon shek.I të erës sonë,  disa fragmente qeramike, copa pitosash dhe enë kuzhine që dëshmojnë për ekzistencën e një vendbanimi fshatar.                                                     

•Krahas tyre janë zbuluar edhe dy bazamente skulpturash antike. Mbi secilin bazament kanë qenë skalitur kuaj dhe një djalosh që mban në duar frerët e tyre. Bazamentet janë në formë gjysmë rrethore, me diametër 41- 42cm dhe trashësi 5cm të punuara me mermer të bardhë. Trajtimi i skulpturave, stili i shkronjave i daton ato në shek.II të erës sonë, të cilat ndodhen të ekspozuara në Muzeun Arkeologjik Kombëtar.

•Gjithashtu në qershor të vitit 2010 në Baldushk janë zbuluar pesë skulptura romake, të cilat vendoseshin mbi varre si mbulojë e tyre. Këto monumente mortore janë me përmasa mbi një metër dhe mendohet që i përkasin shek.III-IV të erës sonë.

Baldushku bën pjesë në zonën me klimë mesdhetare. Territori i tij përshkohet nga përroi i Zhullimës dhe përbëhet nga fusha, kodrina  mesatare, shpate e lugina. Zona është e veshur me pyje shkurre të llojeve si: mare, dëllinjë, shkozë, shqopë, lis, frashër etj. Pyjet e Baldushkut janë natyrorë, përjashtuar një sipërfaqe rreth 770 ha me pishë mesdhetare e mbjellë me fidanë para shumë vitesh.

Prodhimi bujqësor i zonës bazohet në prodhimin bio të perimeve, fruti kulturë dhe të ullishteve. Është kthyer në traditë, dita e gjelave në Baldushk. Në prag të festave të fund vitit ky fshat merr një vëmendje të veçantë nga konsumatorët, për blerjen e gjelit të detit i cili është simboli i tavolinës së festave.

Në territorin e Baldushkut ndodhen fshatrat piktoreskë Mumajes Kodër dhe Shpat, me çezmën historike e Mamicës dhe një shpellë e thellë 30 m. Ndërsa në fshatin Kakunjë ndodhet kisha e vjetër e Shën Mërisë. Fshati Baldushk mbetet një destinacion i bukur me plot potenciale turistike të ndryshme, lumore, malore, agroturizëm për të gjithë ata që janë admirues të natyrës dhe jo vetëm.