Mali i Dhëmbelit

Mali i Dhëmbelit, pjesë e vargmalit Trebeshinë – Dhëmbel – Nemërçkë, arrin një lartësi prej 2080 metrash dhe përbën një nga bukuritë natyrore të jugut të Shqipërisë. Nga këtu, mund të shijoni pamjet e dy luginave të mrekullueshme: lugina e lumit Vjosa dhe lugina e Zagorisë, si dhe peizazhet e maleve të Trebeshinës dhe Lunxhërisë. Madhështia e grykës së Këlcyrës është një tjetër atraksion i rëndësishëm, dhe mund të vizitoni krahinën e Malëshovës, e cila është e njohur për fshatrat karakteristike si Mbrezhdan, Malëshova, Limar dhe Leskaj.

Dhëmbeli është i pasur me bimë mjekësore si çaji i malit dhe sherebela, dhe gjithashtu ofron kullota të gjera. Produktet e qumështit nga kjo zonë, si djathi, gjalpi, salca në shakull dhe gjiza, janë të njohura për shijen e tyre unike. Këto produkte mund të shijohen lehtësisht në restorantet tradicionale të Këlcyrës dhe Përmetit, ku do të gjeni gjithashtu mish të cilësisë së lartë dhe të shijshëm.